TERKÎB-İ HELVA-YI LEB-İ DÎLBER

Faraza bir kıyyelik kabı ölçü addedip ol ölçü ile iki 'asel ve bir ab ve iki parmakdan dün olup lebaleb olmayarak bir revgan-ı sade ölçüp tencere derünuna vaz' olunup ateş üzerine ilkaa oluna. Yine ol ölçü ile basılmamış kabaca olarak silme nişasta ve bir ab ölçüp nişasta-i mezkur ol ab ile iyice ezilip hallolunduktan sonra 'asel-i mezkur ile ihtilad oluna. Kepçe ile karıştırarak tabh oluna. Nihayet yağını taşra ihraç edip böylece bir iki defa yağı mahall-i ahere süzile, yine tabh oluna. Bir mikdar helva-yı mezkurdan soğudup tenavül oluna. Eğer ki damağa yapışmayıp sakızlanmış ise ol vakt matbüh olmuş olur. Ol vakit helva-yı mezkuru bir tepsi içre bast edip fırına irsal oluna. Üzeri kızarıp akîklendikte ihraç oluna. Ba'dehu bir mikdar ağardılmış ve sahk olunmuş badem içi toz şekeriyle ihtilat ederek üzerine bast oluna ve bir mikdar çiçek suyu veyahud gül suyu serpile ba'dehu tenavül oluna.